Kovačević Milica - “Kroz brvacke pinjate” Brca 2021.

Ako ćeš da ti sigurno ispane dobra kontonjada, staja se koliko dunja toliko cukra, ele ga cukar stisne.
E sada, domaćice su gledale da uštede cukar, pa su stajale i manje. A isto zavisi od toga kakve su dunje. Što je manje cukra duže ga variš.
Za kilo dunja stajale su malo manje od kila (oko 80 dkg) cukra i 1 limun
Dunje dobro operi da ki se miču lakice. Tedara ki okini na veće komate. Ne žuli ki, ele u koru ima pektina.
Staji ki u pinjatu i ulij vode teke da ki pokrije. Kad su dunje omekšale procijedi kroz tripito. Voda ge su se varile dunje može se piti kai čaj ili se od nje učini šurup.
Sada izmjeri dunje pa ki samelji na makinu od mesa i stai ki u teću.
(U današnje brijeme samelji ki mikserom na stap.)
Izmjeri i stai cukra, pa stai da se vari na tihi oganj doklen ne bude tvrdo, tako da se teško muti, a da dunje dobiju narandžastu boju. Tedara se ulije u jednu tepsiju namazanu uljom i pušti se jedan dan da se smrzne.
Tedara tepsiju prevrni na jednu šticu, pa neka zastane još dva- tri, mojde i četiri dana da se suši, najbolje na śever.
Tedara je okinini na kocke, ali na fete, kako ti je volja, a za posluživanje ki naredi na pera od lovorike. Ako kontonjadu raniš u kašeticu među pera od lovorike, može durati i pola godine.